Загрузка ...
Тывада хереглекчилер кооперациязының күжү-биле көдээ ажыл-агый бүдүрүлгезиниң болгаш тайга кежиин хүлээп алырының пунктузун Таңды кожууннуң Бай-Хаак суурда ажыткан. Мында алды аңгы соодукчулуг делгелге баартыктары-биле хандыртынган садыг шөлдерин күзелдиг көдээ ишчилерге бараалгадыры көрдүнген. База бир алды садыг шөлдери доктаамал садыглаар болгаш хүлээп алыр чер кылдыр ажылдаар.
Хереглекчилер кооперациязының удуртулгазының демдеглеп турары-биле алырга, республикага ийи хүлээп алыр пункутуну 2013 чылда ажыдары Тываның баштыңы Шолбан Кара-оолдуң эрткен чылдың ноябрь айда кыйгырыын ёзугаар планнаттынган турган. Июль 31-де оларның бирээзи Бай-Хаак суурнуң төвүнге ажыттынган.
Көдээ ажыл-агый продукциязының бүдүрүкчулери бо арыг-силиг, делгем болгаш соодукчулар-биле хандыртынган баартыктарны хүнде 200 акшаны төлээш ажыглаар арганы алган. Чанында бажыңда аңгы садыгны ажыткаш, көдээ амыдыралга эргежок чугула сава аймаа, тудуг материалдары, өске-даа херекселдер болгаш мал чемин садып турар. Көдээ ишчилерниң күзели-биле оларның дужааган бүдүрүлгезин бараанга база орнап ап болур.
Пунктунуң администрациязы өске кожууннарда “Бир суурдан бир продукт” деп төлевилелдиң киржикчилерин болгаш «Тывага бүдүрген бедик шынарлыг» деп демдек-биле демдеглээн продукцияны экеп садарынче чалап турар. База бир хүлээп алыр пунктуну Чадаана хоорайга ажыдары көрдүнген.